A Soberanía Alimentaria, garantía de futuro

Menú Principal

Menú de Destacados

  1. Portada>
  2. Novas>
  3. Política Agraria>
  4. Lidia Senra presentará mañá, no marco das fortes mobilizacións sociais previstas en Annecy, a ponencia “Que políticas agrarias son necesarias para alimentar o mundo?”

Lidia Senra presentará mañá, no marco das fortes mobilizacións sociais previstas en Annecy, a ponencia “Que políticas agrarias son necesarias para alimentar o mundo?”

19 de Septembro do 2008

Vía Campesina

O futuro da política agraria común estará no centro dos debates do Consello informal de Ministros de Agricultura da Unión Europea, que se reunirá en Annecy (Francia) durante os vindeiros días 21,22 e 23.

O Sindicato Labrego Galego, canda as demais organizacións agrarias que formamos parte da Coordenadora Europea da Vía Campesiña, e numerosos colectivos agrarios e sociais, vimos de organizar un programa de actividades paralelo a esta reunión co que esixiremos perante dos gobernantes europeos unha agricultura para podermos vivir, cunha política agraria europea lexítima e solidaria. 

Lídia Senra Rodríguez, membro do Comité de Coordinación da Coordenadora Europea Vía Campesiña, e Xosé Ramón Cendán, ámbolos dous membros da Executiva do SLG, encabezarán a delegación do Sindicato Labrego. 

Asemade, Lídia Senra, presentará o sábado ás 16:30 a ponencia “¿Que políticas agrarias son necesarias para alimentar o mundo?”, no marco do programa de conferencias deseñado pola Coordenadora Europea Vía Campesiña. 

O SLG participará tamén na multitudinaria manifestación que terá lugar o domingo 21. 

A PAC que as organizacións agrarias e sociais esixiremos esta fin de semana en Francia, representa a loita pola produción dunha alimentación de calidade, segura e accesíbel para todas e todos. 

Como sempre reiteramos dende o Sindicato Labrego Galego, o achegamento entre consumidoras/es e productoras/es, así como o fomento de pautas de consumo responsábel, son imprescindíbeis para susentar esta nova PAC. 


Por que esta mobilización? 

A crise mundial dos prezos alimentarios, destacada brutalmente polos motíns da fame que se veñen sucedendo dende principios de ano, ten a súa orixe na simultaneidade de varias causas. 

Primeiramente, as colleitas do 2006 e do 2007, tamén agora as do 2008, estanse a ver afectadas pelos riscos e cambios climáticos. Por outra banda, a competición salvaxe entre as colleitas destinadas á alimentación e as destinadas a agrocombustíbeis industriais vén de empeorar fortemente a situación. 

Mais, sobor de todo, a raíz deste problema consiste na desregularización dos mercados, manexados pelos nosos gobernos a través da Organización Mundial do Comercio (OMC), do Banco Mundial (BM), do Fondo Monetario Internacional (FMI), e da Unión Europea. 

Tras o “chequeo” da Política Agrícola Común no 2008, a presidencia francesa da UE, enceta nesta fin de semana en Annecy o debate institucional que sentará as pautas da política agrícola até 2013. 

Unha agricultura para vivir. Cambiemos a PAC. 

Para o SLG e as demais organizacións integrantes da organización mundial Vía Campesiña, a política agraria europea habería de ser unha ferramenta para regular mercados e parar o empobrecemento e desaparición das labregas e labregos, xa que unha verdadeira e efectiva Política Agraria Común deberá favorecer unha agricultura labrega, aforradora de recursos naturais, composta de pequenas e medianas explotacións. 

Par acadar este obxectivo, cómpre repartir máis equitativamente o apoio público entre as explotacións, entre os sectores e entre os países. O emprego agrícola e rural ten que ser unha das súas prioridades. 

Para iso, é importante relocalizar as producións e dar a prioridade ao comercio local e rexional, ao tempo que se protexe a fertilidade do chan e a súa biodiversidade. 

Unha PAC xusta, ten moito que traballar na súa aportación aos países en vías de desenvolvemento, e habería de favorecer a agricultura dos países do Sur prohibindo toda exportación por baixo dos custos de producción. 

Esta política agrícola é a única capaz de aceptar os desafíos alimentares, sociais e medioambientais que arestora forman parte dunha problemática que afecta, inda que desigualmente, a toda a poboación mundial. 

Moitas grazas pela vosa atención. 

Saúdas do Gabinete de Comunicación do Sindicato Labrego Galego

Dende hoxe até o fin das mobilizacións poderedes contactar con 
Lidia Senra : 609 845 861 
Xosé Ramón Cendán: 619 900 002 


Máis información en www.changeonslapac.org

Ficheiro adxunto