As explotacións de Ordes que solicitaron un plan de mellora estanse atopando con que a falla de persoal técnico na oficina agraria comarcal está atrasando varios meses o cobro destas axudas. No Sindicato Labrego Galego constatamos a existencia de expedientes que xa foron completados e xustificados en xuño, pero que permanecen sen certificar nin resolver dende aquela.
Na conxuntura agraria actual, cos custes de produción disparados debido ao impacto da seca; e os prezos en orixe estancados en niveis de miseria en sectores estratéxicos para esta comarca coma o lácteo, o atraso no cobro destas axudas supón un grave problema de liquidez para as explotacións afectadas. Así llo fixo saber hoxe, 17 de outubro, o secretario de Ordenación Territorial e Infraestruturas do SLG, Xosé Manuel Calvo Rei, ao director xeral de Produción Agropecuaria, Xosé Álvarez Robledo. Na conversa mantida entre Xosé Manuel Calvo e Robledo, o director xeral admitiu coñecer o problema e afirmou que a Consellaría de Medio Rural estaba facendo xestións para que os plans de mellora fosen certificados antes de que remate o ano. Así e todo, o Sindicato Labrego Galego manterase vixiante de cara a comprobar que se realizan as xestións necesarias para axilizar e sacar adiante os plans de mellora de maneira que as explotacións beneficiarias poidan cobrar os cartos a que teñen dereito o antes posible.