Miles de persoas marcharon, este 23 de maio, polas rúas de Ourense para reclamar da Consellaría de Medio Rural que exerza as súas funcións e solucione a crise derivada dos estragos causados polas xeadas de abril e as choivas torrenciais e sarabiadas de maio que afectaron a sectores produtivos coma o vitícola, o da castaña ou o apícola.
A manifestación foi convocada por unha plataforma que non para de medrar, dende que comezase a campaña de mobilizacións en Ribadavia o pasado 13 de maio: Sindicato Labrego Galego, Fruga, UUAA, Asociación de Viticultores do Ribeiro, Asociación de Produtores de Castaña de Viana, viticultores de Monterrei, de Valdeorras, do Ribeiro e da Ribeira Sacra.
No manifesto lido diante da delegación ourensá da Xunta de Galicia, onde unha comitiva se reuniu coa delegada, volveron lembrarlle á conselleira de Medio Rural, Ángeles Vázquez, as demandas do sector:
- Creación, a través das oficinas agrarias comarcais, dun rexistro dos labregos e labregas afectadas e da superficie real danada polas xeadas.
- Creación dunha liña de axudas directas semellante á que se creou para apoiar aos viticultores e viticultoras da Ribeira Sacra afectadas pola sarabia en 2016.
- Condonación das cotas á Seguridade Social, como mínimo durante seis meses, e rebaixas no IRPF para os labregos e labregas afectadas.
- Liña de créditos sen custes de tramitación e con xuros cero para garantir a liquidez das explotacións afectadas, e negociación de moratorias nos créditos xa subscritos con entidades bancarias.
- Renegociación coas compañías aseguradoras das liñas de seguros agrarios para que exista unha oferta aseguradora adaptada ás necesidades reais das nosas producións.