Hoxe, 30 de novembro, comezaron as mobilizacións convocadas pola Plataforma en Defensa do Sector Lácteo que, desta vez queren chamar a atención sobre a posición de dominio e abuso das grandes distribuidoras na cadea de valor. Non en van, os cálculos realizados desvelan que os supermercados quedan con case a metade do que se paga por cada litro de leite (46%). Esta primeira acción tivo lugar no centro comercial das Cancelas, en Compostela, onde opera un hipermercado da cadea francesa Carrefour, e consistiu nunha concentración e no reparto de folletos informativos sobre esta problemática.
Dende a Plataforma quixemos trasladar á cidadanía que o único que acadamos trala xuntanza coa nova conselleira de Medio Rural, o pasado 25 de novembro, foi que esta se comprometerse a mirar pola axilización dun Acordo de Madrid que xa ten demostrado o seu máis estrepitoso fracaso, pois nin subindo os prezos de consumo se conseguiu trasladar o incremento ás granxas. A conselleira tamén falou de crear unha comisión de seguimento do acordo, pero polo de agora só se trata dunha promesa máis que, de cumprirse, tampouco serviría de moito vendo o respecto que lle teñen ao texto asinado as industrias e distribuidoras. E mentres, a situación das nosas granxas segue a ser desesperada, xa que seguimos a percibir prezos semellantes aos de xuño e que nin sequera cobren os custes de produción, igual que cando comezaron as mobilizacións de verán. Polo tanto, dende a Plataforma en Defensa do Sector Lácteo vémonos na obriga de iniciar unha nova vaga de protestas. Desta vez na distribución, informando á cidadanía de toda esta problemática co reparto de folletos informativos nas grandes áreas comerciais das principais cidades galegas e implicando tamén, como fixemos nas manifestacións estivais, á clase política. Desta maneira, seguiremos mañá, 1 de decembro, no Alcampo da avenida Alfonso Molina, na Coruña; e seguiremos durante toda a semana en Lugo, Pontevedra, Ferrol e Vigo.