A Soberanía Alimentaria, garantía de futuro

Menú Principal

Menú de Destacados

  1. Portada>
  2. Novas>
  3. Impulsores xenéticos: Os organismos xeneticamente modificados que poden rematar coa biodiversidade na Terra

Impulsores xenéticos: Os organismos xeneticamente modificados que poden rematar coa biodiversidade na Terra

30 de Xullo do 2019

Impulsores xenéticos

Nesta terceira entrega sobre os organismos xeneticamente modificados (OXMs) imos falar dos coñecidos como "impulsores xenéticos". A que nos referimos cando falamos de impulsores xenéticos? Trátase dunha nova técnica de enxeñería xenética que se usa para forzar a transmisión ás seguintes xeracións dun ou varios xenes en especies vexetais como animais.

A idea das grandes empresas de OXMs é liberar na natureza estes organismos con impulsores xenéticos (OIX) para que, unha vez se reproduzan cos individuos naturais, e co paso dunhas poucas xeracións, a especie natural DESAPAREZA, implicando a súa aniquilación.

Pero non só é unha idea das grandes empresas de OXMs. Para que nos decatemos da importancia estratéxica que teñen os impulsores xenéticos, debemos saber que as entidades que están a investir máis cartos na investigación desta técnica son a Axencia de Proxectos de Investigación Avanzada do Departamento de Defensa dos EEUU e a Fundación Bill & Mellinda Gates. Estas entidades, xunto a outras como Facebook, teñen investido ao redor de 250 millóns de dólares en investigar isto. E de seguro que as súas intencións pouco teñen que ver co progreso e o beneficio da humanidade.

A delgada liña entre o agro e a carreira armamentistica

A técnica dos impulsores xenéticos usarase para provocar a extinción de determinadas especies. Isto, nun contexto de conflito (lembrade, o Departamento de Defensa dos EEUU está metido no allo), pode ser usado para eliminar as fontes de alimentos dos “inimigos”.

No noso eido, a agroindustria propón unha agricultura “á carta” no que se refire á loita contra pragas e enfermidades. Isto, aparte de facer que coma produtoras de alimentos caïamos totalmente nas súas mans e pasemos a depender deles en tódalas facetas da produción (sementes, fertilizantes, fitosanitarios, OXMs con impulsores xenéticos, comercialización...), supón a liberación na natureza de organismos cuns efectos que ningún estudo pode prever, e cunhas consecuencias para as xeracións futuras totalmente descoñecidas.

Os impulsores xenéticos son o ataque máis serio até hoxe contra a natureza e o medio ambiente, contra todo aquilo que nos sostén como especie e nos permite vivir no planeta Terra.

Que sucederá coa humanidade nun medio ambiente totalmente manipulado polas agroindustrias?

Non podemos facernos a máis mínima idea do que o uso destas técnicas de manipulación xenética suporán para o medio ambiente e para nós. Podemos tentar pensar nalgúns dos seus efectos, pero quedariamos moi curtos. O uso destes impulsores xenéticos afectaría o manexo dos cultivos e da terra, a auga, os alimentos. Tamén afectaría ás comunidades indíxenas, campesiñas e tradicionais. Suporía unha uniformización na produción de alimentos aínda máis acusada que a actual, o incremento do control da alimentación por grandes corporacións privadas e un aumento da fenda da riqueza das grandes empresas respecto dos pobos e países.

Todo isto suporía un atranco que anularía o dereito á soberanía alimentaria dos pobos, o dereito a escoller unha alimentación sa e unha nutrición saudable. E, para unha maioría de labregos e labregas, imposibilitaría o dereito a ter unha vida digna.

Diante deste delirio das grandes corporación por facerse co control absoluto da alimentación, o principio de precaución debería impoñerse. Non podemos deixar que sexan unhas poucas grandes empresas confabuladas cos gobernos máis neoliberais as que usen esta tecnoloxía no noso entorno.

Impulsores xenéticos