A Soberanía Alimentaria, garantía de futuro

Menú Principal

Menú de Destacados

  1. Portada>
  2. Novas>
  3. O SLG reclama á Consellaría de Educación marcha atrás na súa intención de clausurar o CEIP de Baamonde

O SLG reclama á Consellaría de Educación marcha atrás na súa intención de clausurar o CEIP de Baamonde

17 de Decembro do 2020

CEIP Baamonde

O Sindicato Labrego Galego quere expresar o seu apoio e solidariedade coas familias do CEIP de Baamonde, no concello de Begonte, diante da intención do goberno municipal e da Consellaría de Educación de pecharlles o centro escolar. Cunha trintena de alumnos e alumnas, e dando asistencia directa a varias parroquias ademais de Baamonde, non se entende esta aposta por desmantelar este servizo esencial para a calidade de vida das familias e a formación da rapazada da zona.

Cando a aposta da Xunta debería ser reforzar os centros escolares que aínda seguen abertos no rural, con máis medios materiais e humanos, de cara a facer atractiva a vida en parroquias onde o tecido social aínda segue tendo forza; dedícase a clausuralos, incentivando a emigración, despoboamento e desertización dun rural que cada vez se ve privado de máis servizos públicos esenciais.

Por iso, o SLG vén de dirixir un escrito ao conselleiro de Cultura, Educación e Universidade, Román Rodríguez, pedíndolle que dea marcha atrás na súa intención de clausurar o CEIP de Baamonde para unificalo co CEIP Virxe do Corpiño na capital municipal, obrigando a todo o alumnado do primeiro a depender do transporte escolar para asistir a clases lonxe do seu domicilio. Se o que quere é facer un conservatorio profesional de música nas instalación do CEIP de Baamonde, tal e como fixeron público varios medios de comunicación, instámoslle a crear un orzamento específico para tal fin cos fondos necesarios para dotar o Concello de Begonte das infraestruturas necesarias para levar a cabo o proxecto, pero que non desvista un santo para vestir outro: Dotar de instalacións un conservatorio de música non pode facerse a expensas de empeorar un servizo esencial como a educación dunha trintena de nenos e nenas, que se verán prexudicados por ter que formarse lonxe do seu domicilio e cunha mingua na calidade do ensino debido ao empeoramento de aspectos educativos como a ratio profesor/alumnado.

Tamén apoiamos a campaña de recollida de sinaturas contra o peche do CEIP de Baamonde na que tamén podes participar en: http://anpa.baamonde.org/firma/