O mercado de alimentos labregos da praza de abastos de San Agustín, na Coruña, inaugurouse onte, 2 de decembro, cun total de oito postos de venda nos que se podía atopar dende hortalizas frescas de tempada até produtos elaborados como empanadas, marmeladas ou conservas, todos cun denominador común: ser ecolóxicos e de proximidade, coa excepción neste último requisito para aqueles alimentos que non se producen nestas latitudes, como o cacao, café ou azucre.
A Coruña xa conta cun mercado de alimentos labregos e ecolóxicos na praza de abastos de San Agustín
2 de Decembro do 2015
Co apoio do Concello da Coruña, a Asociación Labrega Natura inicia esta aventura na que aspiran a aumentar a máis do dobre os postos de venda. Aínda que, polo de agora, están a participar granxas do norte da provincia da Coruña -dende a Costa da Morte até o entorno da cidade herculina- xa teñen recibido cinco solicitudes para participar, algunha de municipios máis distantes como Negueira de Muñiz.
A partir de agora, A Coruña contará co seu mercado ecolóxico todos os martes, de 11:00 a 19:00 horas, aínda que precisamente, a semana que vén, celebrarase en mércores por ser o martes 8 de decembro día festivo.
As sensacións dos labregos e labregas que participaron neste primeiro mercado foron boas, pois tivo moi boa acollida a pesares de ser a primeira vez que se facía e de estar pendente aínda unha campaña para dalo a coñecer entre a cidadanía coruñesa.
Sindicato Labrego Galego © 2008
Subvencionado pola Presidencia da Xunta de Galicia. Secretaría Xeral de Política Lingüística
