Na mañá de hoxe tivo lugar en Santiago de Compostela a presentación e lectura do manifesto da Plataforma en Defensa das Unidades de Xestión Forestal (UXFOR).
Xavier Simón -da UXFOR Costa-Sabugueiro-, Olga Otero -da UXFOR Fonte das Meigas-, Anxo Martínez -da UXFOR Vilaframil- e Rosa Villalibre -da UXFOR A Coviña-, foron @s voceir@s encarregad@s de transmitir os motivos nos que se asenta a nosa demanda dunha figura de xestión conxunta dos montes e expoñer as iniciativas que serán levadas adiante pola Plataforma perante da actual situación de parálise administrativa na que se atopa este proceso.
Ás 12:00hrs. de mañá, martes 26 de xaneiro, terá lugar na Galería Sargadelos de Santiago de Compostela (Rúa Nova, nº16) a presentación da Plataforma en Defensa das Unidades de Xestión Forestal (UXFOR) dando conta do manifesto que as aglutina.
Tra-la análise dos resultados obtidos nos encontros mantidos cos grupos políticos parlamentares, coa Dirección Xeral de Montes e co Delegado Territorial da Xunta da Galiza en Ourense, a Plataforma en defensa das UXFOR vén de decidir facer chegar ao Conselleiro do Medio Rural, D. Samuel Juárez, unha carta crítica coa actitude da CMR ao respeito da paralización total na que se atopa a constitución das Unidades de Xestión Forestal.
Na mañá de hoxe, Charo Sánchez Parga -Vicepresidenta da Asociación FROUMA e Secretaria de Medioambiente, Terra e Montes do Sindicato Labrego Galego-, en representación de máis dunha ducia de entidades, procedeu ao rexistro nos servizos centrais da Xunta de Galiza en San Caetano (Santiago de Compostela), da Declaración e Solicitudes sobre a Praga da Pulguiña do Carballo, así coma da solicitude de reunión dos colectivos asinantes da mesma co Director Xeral de Montes, D. Tomás Fernández Couto.
Ás 12:30hrs. de mañá, martes 12 de xaneiro, Charo Sánchez Parga (Vicepresidenta da Asociación FROUMA e Secretaria de Medioambiente, Terra e Montes do Sindicato Labrego Galego), en representación de máis dunha ducia de entidades entre as que se atopan concellos, colexios profesionais, organizacións do ámbito forestal e sindicatos, procederá a depositar no Rexistro Xeral da Xunta de Galiza (S. Caetano-Santiago de Compostela) un documento de elaboración común no que se dá conta da alta incidencia da praga da pulguiña do carballo (Altica quercetorum), esixindo o reprantexamento por parte da Consellaría do Medio Rural (CMR) das medidas adoptadas para o seu control.