Na tarde do 6 de xullo constituíase en Compostela a Plataforma en Defensa do Sector Lácteo Galego. Ao acto asistiron unhas duascentas persoas, entre as que se atopaban alcaldes e alcaldesas das principais comarcas leiteiras do país e de tódalas cores políticas, os secretarios xerais dos principais sindicatos obreiros, as cooperativas leiteiras e representantes de axentes implicados co sector como almacéns de penso, talleres de maquinaria agrícola, etc.
Dende as organizacións agrarias, explicamos a situación crítica pola que está a atravesar o sector lácteo e achegamos unha serie de demandas nun documento baixo o título “Propostas para a supervivencia do sector lácteo galego” que resume as principais demandas que esta plataforma defenderá a partir de agora diante da Consellaría de Medio Rural, do Ministerio de Agricultura e na rúa, xa que outro dos acordos da asemblea foi convocar unha grande manifestación de todo o sector o 17 de xullo en Compostela.
O Sindicato Labrego Galego estivo representado pola súa secretaria xeral, Isabel Vilalba Seivane, que hoxe, 7 de xullo, estará en Madrid na xuntanza coa ministra de Agricultura para insistir no insostible da actual crise do sector lácteo e na necesidade de tomar medidas urxentes para facerlle fronte.